Պահքի շրջանում սնունդից հրաժարվելը պարտադիր չէ

Մեծ պահքը արդեն սկսվել է և կտևի 48-օր: Շատերի համար պահքը ասոցացվում է կենդանական սնունդից հրաժարվելու հետ, բայց Տեր Թովման քահանա Անդրեասյանը հավաստիացնում է, որ պահքը նախ և առաջ նշանակում է հոգևոր մաքրում. «Սնունդից հրաժարվելը մարզում է հոգին, կամքը, բայց դա պարտադիր չէ: Պահքը սկսվում է սուրբ Հարության տոնից առաջ, և նշանավորում հոգևոր մաքրում: Ես անձամբ այս տարի սնունդի պահք չեմ պահում, որովհետև ունեմ առողջական խնդիրներ, թեև ամեն տարի պահում եմ: Եթե ինչ-որ սնունդից հրաժարվելը պետք է վնասի առողջությանը կամ աշխատանքին, ուրեմն պետք չէ պահել»,-ասում է քահանան:

Պահքի ավանդույթը սկզբնավորվել է 1-ին դարում Հակոբոս տյարն եղբայր առաքյալի կողմից, և մինչ այսօր էլ նրա ավանդույթները անփոփոխ են: «Պետք է հրաժարվել կենդանական սնունդից, բայց մեր եկեղեցին ընդունոմ է մեղրը և մի քիչ կարմիր գինի: Մեղք չէ նաև պահքը կիսատ թողնելը. մեղքը սուտ խոսելն է, բամբասանքը, շատախոսությունը, որից ծնվում են այլ մեղքեր: Իսկ եթե առողջական պատճառով մարդը այլևս չի կարողանում պահել, դա մեղք չի համարվում»,-բացատրում էր քահանա Տեր Թովման:

Նրա ասելով, պահքի շրջանում շատերը դիմում են քահանայի խորհրդին, բայց էնդոկրինոլոգ Բամինե Բաղրամյանը խորհուրդ է տալիս դիմել նաև բժշկի, որովհետև պահք պահելու համար ևս կան սահմանափակումներ. «Կան ալերգիա ունեցող մարդիկ,օրինակ ցիտրուսային ալերգիա ունեցող, որոնց հակացուցված է այս կամ այն սնունդը, նաև որոշակի հիվանդություններ, օրինակ աղեստամոքսային տրակտի հիվանդությունները, կամ տոքսիկ խպիպը, որի ժամանակ խորհուրդ չի տրվում կաղամբի և ծաղկակաղամբի շատ օգտագործում: Այս հիվանդությունների դեպքում խորհուրդ չի տրվում պահք պահել: Բայց, ընդհանրապես, պահքը վնասակար չէ և մաքրում է օրգանիզմը»,-ասում է Բ. Բաղրամյանը:

Իսկ եթե այս սահմանափակումներ դուք չունեք, և ուզում եք պահք պահել, էնդոկրինոլոգը խորհուրդ է տալիս շատ վիտամիներ օգտագործել. «Սունկը իր մեջ պարունակում է մսի մեջ առկա օրգանիզմին անհրաժեշտ բոլոր նյութերը, այն կարող եք օգտագործել մսի փոխարեն, ինչպես նաև շատ օգտագործեք հում վիճակում մրգեր և բանջարեղեն, որովհետև ջերմային մշակման ժամանակ նրանց մեջ առկա օգտակար նյութեր, օրինակ վիտամին C, քայքայվում են»,-ասաց բժշկուհին:

Հարցեր, պատասխաններ, մեկնաբանություններ